文：劉潔迎
每次返嚟宏恩，一入門口望向右手邊，第一個同我打招呼嘅人一定係Ricky叔叔。
到左食晏出去買飯或者放學行落樓梯，第一個同我打招呼嘅都會係佢。我留意到Ricky叔叔真係金晴火眼咁睇實門口有邊一啲人出入，連食飯都睇實個CCTV，睇下大家會唔會有事需要幫忙。
佢每日都係最遲離開宏恩嘅一個。每次當我喺學校開會或者討論功課，佢都會同我哋講，「唔緊要你哋慢慢傾，唔急嘅知道你哋忙」。老實講，有幾多個打工仔唔想放工即刻返屋企㗎，但Ricky 叔叔就將他人嘅需要放喺首位，寧願自己遲啲放工。
我相信唔少人都認為男性係一定無女性咁細心，但Ricky叔叔就特別唔同。好多時，同學仔無返或者病左佢都會留意到，見到我哋都會好關心我哋近況。唔單止咁，佢會願意花時間同同學分享人生閱歷。佢絕對唔會用長輩嘅身分強行將佢自己嗰套洗我哋腦，佢會用心同我哋分析、拆解，而且仲好明白時下年輕人嘅諗法添。我成日都懷疑佢讀過社工課程，佢比我以前接觸過嘅青年中心社工更似社工囉
老實講，呢一代好多年輕人都不能再接受從上而下的權威式領導。一位善於聆聽、甘於服侍、識得彼此尊重和勇於承擔嘅領袖更能吸引別人嘅追隨。
喺我心目中嘅僕人領僕，係要了解別人嘅需要，體諒別人嘅難處，願意用服待嘅心與同行者嘅身分與別人同行；用自身行動去影響別人，能夠引導別人發揮自己嘅潛能。
我認為Ricky 叔叔擁有晒以上嘅特質。佢做事唔會怕蝕底，工作認真，對身邊嘅人和藹可親。就好似麵包超人，即使畀人食咗自己嘅麵包會無咁有力氣，只要能夠幫到人，都會毫不猶豫去幫對方。
睇到佢為大家做嘅事令我對自己以往嘅工作態度亦有所反省。唔單止咁，同佢閒談亦令我哋有所成長。同佢唔會有對其他長輩傾偈嗰一種嘅壓力，佢嘅說話永遠都係充滿鼓勵性，令我覺得自己係仲有能力去發揮無限嘅可能性。
Ricky叔叔令我睇到人嘅真善美。日後，我希望能夠同佢一樣可以用自身嘅力量去為他人帶來多一點幸福，作他人嘅僕人領袖。
到你啦，別小看每一個故事（聲音檔案都得㗎）：https://goo.gl/tf2M4d