謝謝多一位CM同學接受邀請回應。
口述：鍾詠嫻
細心睇，呢份禮物唔係價值高昂嘅珠寶首飾，而係農產品。產品嚟自馬寶寶社區農場，受住政府新界東北發展影響嘅農場。翻查Facebook，先知呢個本地農場，主張有機種植，唔用化肥農藥，回收社區嘅廚餘，自製肥料，順應天時種植合時嘅農作物，盛夏種瓜豆，寒冬種蔬菜，推行本地生產，本地銷售，減少交通成本，實踐永續耕作嘅地方。居住喺北區嘅道心，能夠送呢啲農產品，令到鄰居都認識馬寶寶農場，認識永續農業，比起贈送金銀珠寶，好似更有意義。
送贈禮物本身只有收贈嘅人得到益處，但道心今次喺送贈過程能夠認識馬寶寶，實際買咗佢哋嘅農產品，支持佢哋，將訊息帶畀鄰舍，令北區居民和作業者連上更密切嘅關係，實在係一次三贏嘅活動。而我呢，正正係缺乏咗與社會上受壓迫嘅人嘅一種連繫。我呢，對社會發生嘅事真係莫不關心。佢哋正在主張有益嘅種植耕種方法，種出健康嘅農產品。我哋卻喺度食有農藥嘅農作物，忽視咗佢哋對有機耕種嘅付出，亦都莫視咗政府對佢哋嘅壓迫。
喺呢件事上面，我哋多咗認識，好多謝道心呢次嘅行動。我喺度諗，我可以點回應呢件事呢？我可以付出呢咩去履行社會公義？我又可以為呢件事去到幾盡？