Site news

 
 
Picture of School of General Education
【S Project】待了三十年
by School of General Education - Friday, 8 February 2019, 10:25 AM
 

口述:李建贀

嗱,我哋呢個平台花園呢,我係有個特別嘅感覺。同學一般以為我嚟咗宏恩三年幾四年,其實唔係嘅,我三十年前就已經嚟過呢到。當年我[由美國]返嚟香港冇耐,香港大學持續進修學院(即係SPACE)就開個新課程,專係畀政府嘅建築師、房屋經理呀,要佢哋上一啲公共行政課程,必修嘅。即係要佢哋補飛,唔剩係管房屋、管人呀、管政府啲問題。咁就開咗個新課程,請咗我嚟教,地方就喺呢到。 

我記得個地方真係乜都冇,剩係班房呀啲廁紙咁樣。呢個花園係乜都冇,剩係得空間,畀人行行企企,所以冇咩人用,冇乜花,更冇枱枱櫈櫈呢啲木板。因為夜晚上堂,啲人都咬住個菠蘿包,走入課室跟住瞌眼瞓。

哈,估唔到卅年後,我又走返嚟呢個地方,用返呢到。但係好唔同嘅地方,係轉咗另一個學校環境,特別呢個地方[指花園],就真係靚好多。舖上呢啲木板啦,我唔識形容呢啲物料,好靚嘅物料,可以透水呀。另外就好多花,我估唔到呢到可以變成一個花園。呢啲花其實好多樣我都好喜歡,個問題係,小弟有限嘅生物學呢,只識兩種植物,一種叫洋紫荊,一種叫黃槐,因為中學讀生物時老師剩係教呢兩種。除咗玫瑰,其它成日見嘅都嗡唔到。

但係有兩個同學好有心。第一,佢哋好識得處理呢啲盆栽,我隨便抽一種植物,問佢哋係乜嚟㗎,佢可以話畀我知乜名,同埋點樣栽培,所以我都上咗另一個生物堂。不過佢講完之後我都唔記得咗(笑)。仲有,佢哋開始唔係剩係買花,仲整埋啲盆栽,好似新界嗰啲淨院呀,好靚嘅山水景,真係比得上嗰啲水平。後期呢,今年啦,就多咗啲玫瑰,有第三個同學仗義咁做啲玫瑰。我覺得好靚,靚都不得止,種玫瑰呢位同學,可以話係用醫生做手術嘅角度去處理啲玫瑰,鋪晒紙,好多工具,好多盆,然後慢慢整。我個感覺係,哈,究竟佢喺到做手術吖,抑或做園丁呢(笑)。點都好,如果一個園丁,種花可以種到外科手術咁精緻咁仔細,呢個花園由佢哋安排,我相信你都唔會有異議啦。所以呢個花園令我覺得好唔同,卅年前係乜都冇,宜家我發覺非常好。

仲有,嗰兩位男同學,試過有次打風,十號風球之後,我走返嚟下乜環境,原來佢兩個已經喺呢個花園收拾梗個殘局。仲有,唔止呢個花園,仲加埋樓下個門口,教會嘅西洋杉,幫手整理。嗰咋杉樹好靚,好高,教會外國個維修員,雖然都好高,但一個人做晒都好辛苦。

其實本來我有個計劃,將呢個平台轉成練武廳,打算擺個木人樁,位都諗埋,每晚五點零六點零就開壇,練下功夫,打下木人樁,又可以訓練下啲同學。不過我諗,木人樁得一個,不過諗到玫瑰同木人樁有啲相衝。人哋喺到嘆下茶,做下園丁,我就喺到bing ling bang lang打交,呼呼喝喝唔係幾啱key,最終都係冇提出嚟。所以個木人樁詠春嘅計劃,我收返落櫃桶底算啦。呢個地方,留返畀呢三個同學精心布置。 

我自己認為,呢三個同學,學校最低限度要有個好好嘅獎勵,終極嘅in-house service。喺佢哋畢業之前,學校要畀個合理嘅鼓勵,同埋認許。我唔講邊三個同學,但係大家都知,真係好有心,令到呢個環境啲人坐落去好舒服。對我嚟講,我經歷過三十年乜都冇嘅環境,同埋三十年後都有盆栽相當好嘅環境,呢個轉變令我感受好深。我會好認真推薦,學校應該畀呢三位同學終極嘅校內服務獎,有錢有禮物嗰隻,唔係求求祈祈畀張沙紙。因為佢哋真係花咗好多心機,就算講最低工資呀,都成三十七蚊一個鐘,佢哋喺呢到都唔知花咗幾多個鐘,剩係講十號風球之後,佢哋都花咗幾個鐘喺到啦。唔係錢嘅問題,而係你睇到一啲識花之人,鐘意同植物或者欣賞植物、欣賞生命嘅人,佢哋點樣花心機栽培一個環境,令到呢到變得咁有生氣,而唔係一個沈悶嘅空間,我覺得學校應該有恰當嘅認許。

投稿(聲音檔案都得㗎):https://goo.gl/tf2M4d